إن ڤيديو على قناتك يطلع ترند على اليوتيوب، ده شئ مش سهل. لازم تكون عارف إن اليوتيوب شغال بمنطق معين مكتوب في شكل كود. الكود ده بيشتغل تلقائي في اليوتيوب. والكود ده اسمه خوارزمية. اسمه بالإنجليزي ألجوريزم (Algorithm). الهدف من الخوارزمية المنطقية دي إن الفيديوهات اللي بمواصفات معينة تظهر في قائمة الترند.
عشان الفيديو يطلع ترند لازم يكون أعلى في المواصفات دي مقارنةً بالفيديوهات اللي ظاهرة في الترند. والمواصفات دي هي:
١. عدد المشتركين
نادراً لما يظهر فيديو ترند لقناة فيها أقل من ٢٠٠ ألف مشترك. عشان كده لازم تسعى للوصول إلى أكتر من ٢٠٠ ألف مشترك في قناتك عشان تقدر توصل فيديوهاتك تكون ترند على اليوتيوب فيما بعد.
٢. معدل نشر الفيديوهات على اليوتيوب
كل القنوات اللي بتظهر فيديوهاتها ترند على اليوتيوب، بتنشر فيديو أو إتنين كل أسبوع. صعب توصل فيديوهاتك للترند إن كنت بتنشر فيديو كل شهر مثلاً. حاول تنشر فيديوهات أكتر على اليوتيوب.
٣. click through rate
معدل النقر إلى الظهور (click through rate) هو عبارة عن كام واحد فتحوا الفيديو بتاعك لما شافوه، مقارنةً بعدد الناس اللى شافوا الفيديو ومفتحوش الفيديو. اليوتيوب بيظهر الفيديو بتاعك على اليوتيوب لعدد كبير من الناس. كام واحد من الناس اللى شافوا الفيديو بتاعك ضغطوا على الفيديو واتفرجوا عليه؟! هو ده معدل الضغط إلى الظهور.
معدل الضغط إلى الظهور بيختصروه لـ CTR. عشان تزود معدل الضغط اعمل فيديوهات بإستهداف صح، وصورة مصغرة جذابة وتثير الفضول، وعنوان فيديو جذاب ومميز ويثير الفضول برضو.
لو كان معدل الضغط إلى الظهور أقل من ١٠٪ صعب توصل للترند. معدل ضغط إلى ظهور ١٠٪ معناه إن ١٠٪ من الناس اللى شافت الفيديو بتاعك على اليوتيوب فتحوه واتفرجوا عليه. وده رقم قليل خالص. إنت محتاج على الأقل ٣٠٪ معدل تشغيل فيديو لظهوره للناس عشان توصل ترند.
٤. audience retention (معدل الاحتفاظ بالجمهور)
معدل الاحتفاظ بالجمهور معناها الناس حضرت كام ثانية من الفيديو بتاعك. كل واحد من اللي اتفرجوا على الفيديو بتاعك على اليوتيوب، اتفرجوا علي كام في المية من الفيديو. هل اتفرجوا على ٣ دقايق من الفيديو اللي هو ١٠ دقايق؟ هل اتفرجوا على ٦ دقايق من الفيديو اللي هو ٨ دقايق؟ عشان كده هتلاقي أصحاب قنوات اليوتيوب بيخلوا اللى على الصورة المصغرة هو آخر حاجة يتكلموا عنها، عشان انت تتفرج على الفيديو للآخر.
تلاقي كمان فيديوهات بعنوان "أغرب ١٠ أشياء إلخ إلخ" ويقولك أغرب واحدة هتلاقيها في آخر الفيديو. ليه؟ عشان تتفرج لحد آخر الفيديو. لو انت عندك معدل الإحتفاظ بالجمهور أعلى من ٣٠٪ هتوصل ترند. لكن لو أقل من ٣٠٪ انسى انك توصل ترند على اليوتيوب. عشان كده ركز إنك تتكلم بصوت واضح، وطريقة عرض جذابة ومسلية وجميلة عشان الناس تكمل لحد آخر الفيديو.
٥. watch time (إجمالي وقت مشاهدة الفيديو)
كام دقيقة الناس حضرتها من الفيديو. في شخص حضر ٣ دقايق من الفيديو. وواحد تاني اتفرج على ٥ دقايق من الڤيديو. وواحد تالت اتفرج على ٩ دقايق من الفيديو. بكده وقت المشاهدة للفيديو هو ٣+٥+٩=١٧ دقيقة. المطلوب منك إنك تخلي الفيديو يوصل لأعلى وقت مشاهدة ممكن. إزاى؟
انشر فيديوهات أطوال من ٥ دقايق، اعمل فيديوهات مسلية وممتعة عشان الناس تتفرج على أكبر وقت ممكن منها، انشر الڤيديو بتاعك في كل مكان على الفيسبوك وموقعك الإلكتروني، وعلى كل مواقع التواصل الإجتماعي.. عشان توصل لأكبر عدد من الناس. بس بلاش تزعج الناس. حاول توصل للناس إللي مهتمين بڤيديوهاتك فقط. لأن إزعاج الناس (spam) ممكن يعملوا بلاغ عنك للفيسبوك، أو يحضروا دقيقة أو أقل من الڤيديو وبكده انت اللي هتخسر في الإحصائيات بتاعة اليوتيوب.
٦. التفاعل مع الفيديو
شجع الناس إنها تتفاعل مع الفيديو عن طريق الإعجاب (لايك) أو عدم الإعجاب (ديسلايك) أو كتابة تعليق (كومنت). أى تفاعل على الفيديو هو مفيد حتى لو كان dislike اللي هو عدم إعجاب.
٧. social signals (مشاركات السوشيال ميديا)
شجع الناس إنها تشير فيديوهات، وتبعت فيديوهاتك لأصحابهم اللي مهتمين بالموضوع إللي انت بتتكلم عنه في الفيديو. وأنت كمان شارك فيديوهاتك على انستاجرام وفيسبوك وتويتر وعلى الإيميل (لو عندك نشرة بريدية) وعلى موقعك.
مش كل الفيديوهات ممكن تطلع ترند
فيديوهات الطبخ سهل تطلع ترند لأن في ناس كتير مهتمة بيها. فيديوهات المقالب والمواقف المضحكة والطرائف سهل تطلع ترند لأن ليها جمهور كتير مهتم بيها. فيديوهات كرة القدم سهل تطلع ترند لأن ليها جمهور كبير جداً. فيديوهات التكنولوجيا ممكن تطلع ترند لو عن منتج ناس كتير منتظراه زى موبايل جديد مثلاً.
لكن الفيديوهات التعلمية صعب تطلع ترند. لأن الناس اللي هتتفرج علي الفيديوهات بمجرد نزولها على اليوتيوب قليل خالص. دي مش مجال ترند. دي فيها ميزة مختلفة. الفيديوهات التعليمية دي evergreen content يعني محتوى هيفضل دايماً مطلوب. بمعني إن الناس مش هتبطل تتفرج عليه لأنه فيديو تعليمي مش مجرد حدث وعدّى.
لو نطاق الاستهداف محدود هيكون صعب توصل تريند. يعني لو بتتكلم عن شئ تفصيلي مش عام. وعدد المهتمين بالجزء ده قليلين هيكون صعب توصل ترند على اليوتيوب. المجالات العامة اللى مهتم بيها ملايين الناس هي اللي سهل تطلع ترند على يوتيوب.
أتمنى أكون أفدتكم في الشرح ده. استنوني في شرح تاني عن حاجه مهمة إن شاء الله. ولا تنسى الإشتراك بـ بريدك الإلكترونى فى النشرة البريدية لكى تصلك كل الموضوعات الجديدة.
0 تعليقات جوجل